Пәкістан

Пәкістан (урду: پاکِستان‎ [paːkɪˈst̪aːn], ағылш. Pakistan [ˈpækɪstæn] немесе [pɑːkiˈstɑːn]), толық атауы— Пәкістан Ислам Республикасы (урду: اسلامی جمہوریہ پاکِستان‎ Ислами Джумхурийе Пакистан, ағылш. Islamic Republic of Pakistan) — Оңтүстік Азиядағы мемлекет. Жер аумағы — 803,9 мың км². Халқы 223,34 млн (2017). Жергілікті тұрғындары пенджабтықтар, пуштундар, синдхилер, белуджилер. Ресми тілі — урду. Мемлекеттік діні — сунни ислам. Астанасы — Исламабад қаласы Әкімшілік жағынан 4 провинцияға бөлінеді. Мемлекет басшысы президент. Жоғары заң шығарушы органы — 2 палаталы парламент (Сенат пен Ұлттық ассамблея). Заң жобаларының исламмен сәйкестігін қадағалайтын орган — Ислам кеңесі. Ұлттық мейрамы 14 тамыз — Тәуелсіздік күні, Пәкістан күні — 23 наурыз (1956). Ақша өлшемі — пәкістан рупиі.